ردية بين الملك فيصل واللويحان رحمهما الله وقد كان الملك فيصل رحمه الله شاعرا لا يشق له غبار ولكن اعباء الملك و السياسه كانت تقف حائلة بينه وبين ان يظهر كشاعر رحمه الله رحمة واسعه..
قال لويحان
]الليله الليله الليله نبا الطاروق طرقٍ غريب
مثل الدراهم الى قاموا صيارفها يعدونها
والله ما ادري يطيب لسيدي والا ترى ما يطيب
ان كان ما ناسبت لك يا سنادي جزت من دونها
/
/
فقال الملك فيصل
الليله الليله الليله شواريبٍ تحد الشريب
والاجنبيه الى وردت على المارد يحدونها
ياذيب ياذيب ياللي جر صوته في علو الشذيب
ذكرت عيني وهلت واهملت من عقب مظنونها
:
قال لويحان
عندي خبر بك جروحٍ ما يسر بها علاج الطبيب
مير انحروا روضة التنهات ساكنها يداوونها
من قال ابا اصبر وابا اكنا الجرح لين انه يجيه العزيب
يصير بين الرجا والياس باعوها ويشرونها
/
/
فقال الملك فيصل
ما نيب زملٍ عليها من بعيد ولا قريبٍ طنيب
يا عسرها وانت تحسبها ولو صديت يا هونها
تراي لو صرت عنه ابعيد مرجاعي عليهم قريب
والديره اللي نحل ابها عدانا ما يحلونها
وفي ردية ثانية بين الملك فيصل واللويحان
/
/
قال الملك فيصل
خابرك تذكر بساتينٍ ثمرها الورد والهيل
هو حاضرٍ نفعها والا متى حتنه يصيري
بالحيل بالحيل يالويحان انا مشتاق بالحيل
ليتك تشاور لنا الوقيّف كوده يستخيري
/
/
قال لويحان
من حال هاك البساتين النظيفة علّها السيل
يقودني صوب حلو اثمارها خيط الحريري
وقيّفها يا وسيع المعرفه ما يفهم القيل
تثور بندق قليل الفود في وسط الجفيري
/
/
قال الملك فيصل
انا احسب انك على اللزمات بالقالات حلحيل
تسعى لنا في طريق البيع والناقد بصيري
حنا الى من شرينا يحضرونك حزت الكيل
وتشوف بالعين يا مشكاي ما قلبك غريري
/
/
قال لويحان
والله ما في يدي قوة ولا حيلة ولا حيل
حيث ان حبي الى شافوك يمضونه شعيري
من طرد الصيد يذبح بالجفار وبالمغازيل
واللي يجر السرايا للعدى لازم يغيري
/
/
قال الملك فيصل
الى غزينا عليهم فانت قيدوم الدواليل
صيّور ما نلطم الخصمين بالحد الشطيري
ويش انت خابر يوم انك جبت لي بعض المناديل
تقول هذا مليته من زهر بستان غيري
/
/
قال لويحان
والله فلا ابغى فزوع ولا جرود ولا محاويل
الناس في حكم رجالٍ على العالم خطيري
ما ظن به كهربه تجذب كما يجذب التيل
والا فلا صار شي اولا بعد قر القريري
/
/
قال الملك فيصل
لياس تيّس ولو صارت عواكيس وغرابيل
صيّور ما يحمد المصباح سرايٍ يسيري
الناس وقت الصرام كرام في كل المحاصيل
واليوم نبغى كرمكم يوم جا وقت العصيري
/
/
قال لويحان
تراي اميّز المخراج قدام المداخيل
بحال ابا اخشرك وبحال ترى منتب خشيري
خادم وحامل سلاحي مالنا بالعدل والميل
ولا يخاشر سلاطين الملوك الا الوزيري
وفي ردية ثالثة بين الملك فيصل واللويحان
قال لويحان
هاضني براق ليليٍ تسارا
لاح برقه واعترض في كل ديره
يا طويل العمر كنا بالنهارا
الله العم بالبيان وبالسريره
/
/
فقال الملك فيصل
شوفكم بالعين ولا بالخبارا
كود توهف لي على حروة غديره
خلنا باللوح بالمارد خشارا
والخشير ملّزمٍ يخشر خشيره
:
فقال لويحان
يا اشقر الجنحان يا طير الحبارا
انت تدري بالمضره والبريره
اتعذر منك زينات العذارا
اسمحوا لي بالكبيره والصغيره
/
/
فقال الملك فيصل
والله ان ودي مع الدرب انتبارا
والسبور تروح قدام المغيره
وش علامك تنحرف عني يسارا
ما تبي مجراي والشسطه قصيره
فغيّر الملك فيصل الطاروق بطاروق فريد وغريب من نوعه
خفا ما على مثل خفا
ولو كان بتخفونها
اعرف القصير امن الطويل
عسى القصر يكهل من بناه
وفا اللوح ولا ما وفا
لالزا شدها يمتونها
انا ما ادعيك بلا دليل
ولا اضرب طواريق الفلاه
/
/
فقال لويحان
طفا سوها عني طفا
مقالات لا تحيونها
تسامح عسى عمرك طويل
ومن جاز له درب مشاه
صفا الوقت ولا ما صفا
صعيبات واقصر دونها
سبب حملهم حملٍ ثقيل
ولا كل من شاله قواه
والسلام عليكم ورحمة الله وبركاته
الإثنين مايو 17, 2010 10:02 pm من طرف 
